ევროპულმა საბჭომ საქართველოს კანდიდატის სტატუსი მიანიჭა

 

საქართველო ევროკავშირის წევრობის კანდიდატი ქვეყანა გახდა. ევროპულმა საბჭომ საქართველოსთვის კანდიდატის სტატუსის მინიჭების გადაწყვეტილება მიიღო. ამის შესახებ ევროპული საბჭოს პრეზიდენტის შარლ მიშელის მიერ სოციალურ ქსელ X-ში გავრცელებულ განცხადებაშია ნათქვამი.

ამასთან, ევროპულმა საბჭომ მიიღო გადაწყვეტილება, უკრაინასა და მოლდოვასთან გაწევრიანების მოლაპარაკებების გახსნის შესახებ.

„ევროპულმა საბჭომ გადაწყვიტა უკრაინასთან და მოლდოვასთან გაწევრიანების შესახებ მოლაპარაკებები გახსნას. ევროპულმა საბჭომ საქართველოს კანდიდატის სტატუსი მიანიჭა. ასევე ევროკავშირი გახსნის მოლაპარაკებებს ბოსნია-ჰერცეგოვინასთან მას შემდეგ, რაც წევრობის კრიტერიუმებთან შესაბამისობის საჭირო ხარისხი იქნება მიღწეული და მოიწვია კომისია მოამზადოს შესაბამისი ანგარიში ასეთი გადაწყვეტილების მისაღებად. ეს არის იმედის ცხადი მესიჯი მათი ქვეყნებისა და ჩვენი კონტინენტისთვის", - დაწერა მიშელმა

წყარო: https://www.interpressnews.ge/ka/article/781434-evropulma-sabchom-sakartvelos-kandidatis-statusi-mianicha

მოკლემეტრაჟიანი ფილმი პირველი ხორგა (ვიდეო)

 

გთავაზობთ ირაკლი შონიას მიერ შექმნილ მოკლემეტრაჟიან ფილმს სოფელ პირველ ხორგაზე, (რომელიც მიუძღვნა თავის დედულეთს): ისტორიკოს გოგიტა ჩიტაიას მიერ გამოცემული წიგნის „ხობის მუნიციპალიტეტი“ -ს მიხედვით.

თანადგომისთვის მადლობას ვუხდი: ლევან ჯობავას, ლევან ღვინჯილიას, ბესიკ კორტავას, ადა შელიას და მარიამ შელიას. ტექსტი:

პირველი ხორგა

პირველი ხორგა მდინარე ხობისწყლის მარჯვენა ნაპირზე მდებარეობს. იგი საბჭოთა ხელისუფლების დამყარებამდე შედიოდა ხორგის თემში, რომელიც ერქვა ვრცელ ტერიტორიას ხობისწყლის ორივე მხარეს ხობიდან ყულევამდე და არაერთგზის დასახელებულია შუასაუკუნეების სამართლებრივ ძეგლებში. აქ აფხაზეთის კათალიკოსს სასახლე ჰქონია. ხორგა აღნიშნულია არქანჯელო ლამბერტის რუკაზე. ხობამდე 7 კილომეტრია.

1873 წელს დაწყებითი სკოლა გაუხსნიათ. სოფელში 61 გვარის 281 კომლი, 769 სული ცხოვრობს. გავრცელებული გვარებია: ბერაია, კორტავა, შელია, ჩარგაზია, დოლბაია, ჭაჭია, ნაროუშვილი (ადგილობრივი ვარიანტი ნაროუსქუა), მირცხულავა, ქობალია, გვარამია... ფუნქციონირებს საბავშვო ბაღი.

საინტერესო ტოპონიმებია: ვეხი-მინდორი, კოდორე- ამაღლებული ვაკე, მამული-მინდორი, ნაბერუ-ტყე, ოფაშ ნავანუ-ყანა, ოუნე-სახნავი, ბერულეფიშ კარე-მინდორი,; ღელეები: ასუა, კარცხაპი, ნაბერუ, ნარჩაბუ, ოცხენებოგა, სასქური, სკვია, შქაღალი, წყაბუ, ლესქური; უბნები: საბერაიო, სამირცხულა, სადოლბაიო, საკორტა, სალეფონა, სანარსქუო, საშელიო, საჩარგაზიო, საჭოჭუო, საქობალიო.

მოსახლეობის ძირითადი საქმიანობაა მარცვლეული კულტურების მოყვანა და მესაქონლეობა. აქაურ ნიადაგებზე კარგად ხარობს სიმინდი, ლობიო, სოიო, თხილი, ფეიხოა, კივი..... როგორც დამხმარე მეურნეობას უძველესი დროიდან მისდევენ მეთევზეობას.

სოფელში არის ადგილები-გვიმარონი, დიშ ნახორი, დიხაკიცი, ნააკოპუ, საანგურო, რომლებიც წარმოადგენს არქეოლოგიურ ძეგლებს, ისინი ადამიანის სამეურნეო საქმიანობის შედეგად ძლიერ არიან დაზიანებული.

პირველ ხორგაში მიწისზედა ისტორიული ძეგლები არ შემორჩენილა, აქ არის ადგილი, რომელსაც ოხვამეკარი-მუხურჭალე ჰქვია, მდგარა წმინდა გიორგის სახელობის ეკლესია, რომელიც საბჭოთა ხელისუფლების პირველ წლებში დაუნგრევიათ. ამ ტაძარს მისარონის წმ. გიორგისაც უწოდებდნენ. ამ მიდამოებში ხობისწყლის პირზე დიდი რაოდენობით ფიქსირდება ანტიკური ხანის თიხის ჭურჭლის ფრაგმენტები.

პირველი ხორგიდან არიან: პოეტი ალიო მირცხულავა, სკოლის ეზოში დგას მისი ბიუსტი, ფუნქციონირებს ალიო მირცხულავას სახლ-მუზეუმი. ამ სოფლიდან არიან აგრეთვე პოეტი-აკადემიკოსი ვაჟა ეგრისელი-დოლბაია, ისტორიკოსი ილია მირცხულავა, ფიზიკის მეცნიერებათა დოქტორი, პროფესორი იონა მირცხულავა, რეჟისორი რეზო მირცხულავა. ზაალ ბერაია ბერძნულ-რომაულ ჭიდაობაში საქართველოს მრავალგზის ჩემპიონი და სხვადასხვა ტურნირების მრავალგზის გამარჯვებული იყო. რომული მირცხულავა წლების განმავლობაში ხობის ,,კოლხეთის’’ საფეხბურთო კლუბის კაპიტანი იყო, მკლავჭიდელი დათუნა ჟიშკარიანი მსოფლიოსა და ევროპის ჩემპიონი და მრავალგზის პრიზიორია.

პირველ ხორგელი ჯარისკაცი გოგა ბერაია 2008 წლის რუსეთ-საქართველოს ომს შეეწირა. პირველ ხორგაში მოქმედებს იოანე ნათლისმცემლის სახელობის დედათა მონასტერი. #პირველიხორგა #ხობი #სამეგრელო #მემიყვარსხობი #ხობიჩემისახლია #საქართველო

გოგა ბერაიას სახელობის ტურნირი

18-19 აპრილს, ხობის მუნიციპალიტეტის პირველი ხორგის ადმინისტრაციულ ერთეულში,  აგვისტოს ომის დროს დაღუპული რეზერვისტის, გოგა ბერაიას სახელობის ტურნირი გაიმართა მინი ფეხბურთში.

პირველობის გამარჯვებული ქალაქ ხობის გუნდი გახდა, ხოლო მეორე ადგილი ქარიატის გუნდმა დაიკავა. 

ფინალურ შეხვედრას ხობის მუნიციპალიტეტის საკრებულოს თავმჯდომარე ლევან ქავთარაძე, ხობის მუნიციპალიტეტის მერის მოადგილე დავით ბერაია და თვითმმართველობის სხვა წარმომადგენლები ესწრებოდნენ.

სპორტული ღონისძიება ხობის მუნიციპალიტეტის მერიის და ა(ა)იპ „ხობის მუნიციპალიტეტის საფეხბურთო კლუბ „კოლხეთის“ ორგანიზებით  განხორციელდა.

გოგა ბერაიას სახელობის თასის გათამაშება მინი-ფეხბურთში

 

19 აპრილს,პირველი ხორგის ადმინისტრაციულ ერთეულში, გოგა ბერაიას სახელობის სტადიონზე, სტარტი აიღო აგვისტოს ომის დროს დაღუპული რეზერვისტის გოგა ბერაიას სახელობის თასის გათამაშებამ  მინი-ფეხბურთში. ტურნირში პირველი ხორგის, შუა ხორგის, ქარიატის, ჭალადიდის, ხეთის და ქალაქ ხობის ადმინისტრაციული ერთეულების გუნდები მონაწილეობენ.

ტურნირის გახსნის ცერემონიას ხობის მუნიციპალიტეტის გამგებლის მოადგილე მახარე ჩოკორაია ესწრებოდა.

სპორტული ღონისძიება ადგილობრივი თვითმმართველობის მხარდაჭერითა და ა(ა)იპ „ხობის მუნიციპალიტეტის საფეხბურთო კლუბ „კოლხეთის“ ორგანიზებით  ხორციელდება.

გოგა ბერაიას სახელობის ტურნირი ფეხბურთში

 

დასრულდა, აგვისტოს ომის დროს დაღუპული რეზერვისტის, გოგა ბერაიას სახელობის ტურნირი მინი ფეხბურთში.

ტურნირის გამარჯვებული და გოგა ბერაიას სახელობის თასის მფლობელი ქალაქ ხობის გუნდი „ჭალე“ გახდა, ხოლო მეორე ადგილი შუა ხორგის ადმინისტრაციული ერთეულის გუნდმა დაიკავა.

საფეხბურთო ტურნირის ფინალურ შეხვედრას ხობის მუნიციპალიტეტის საკრებულოს თავმჯდომარე ლევან ქავთარაძე, ხობის მუნიციპალიტეტის მერის მოადგილე დავით ბერაია და თვითმმართველობის სხვა წარმომადგენლები ესწრებოდნენ.

სპორტული შეჯიბრება ა(ა)იპ „ხობის მუნიციპალიტეტის საფეხბურთო კლუბ „კოლხეთის“ ორგანიზებით განხორციელდა.

პირველ ხორგაში ახალი ბაღი გაიხსნა

 

ხობის მუნიციპალიტეტის პირველი ხორგის ადმინისტრაციულ ერთეულში 30 აღსაზრდელზე გათვლილი ახალი საბავშვო ბაღი გაიხსნა.

ბაღი ხობის მუნიციპალიტეტის მერმა დავით ბუკიამ, საკრებულოს თავმჯდომარემ ლევან ქავთარაძემ და სამეგრელო-ზემო სვანეთის სახელმწიფო რწმუნებულის მოადგილემ დავით კუხალეიშვილმა გახსნეს.

ახალი ბაღის მშენებლობაზე  ადგილობრივი ბიუჯეტიდან 500 000 ლარამდე დაიხარჯა და სოფელს კეთილმოწყობილი ინფრასტრუქტურული ობიექტი შეემატა.

ქართული გაერთიანებული სამხედრო სკოლის მეთაურები და ხელმძღვანელები (1923 წ.)

ქართული გაერთიანებული სამხედრო სკოლის მეთაურები და ხელმძღვანელები (1926 წ.)

რომელთა შორის მეორე რიგში მარცხნიდან მესამე არის წარმოშობით ხობის რაიონის მკვიდრი სოფელი პირველი ხორგიდან ტერენტი შელია ის ამ სასწავლებლის მდივანი გახლდათ ამავე ისტორიულ ფოტოზე ასევე ხობელი წარმოშობით ბიელი ა.იოსავაა, რომელიც ფიზკულტურის ხელმძღვანელი იყო.

მადლბას ვუხდით  ლევან ღვინჯილიას აღნიშნული მასალის მოძიებისთვის!

წყარო: საქართველოს ეროვნული არქივი

ტერენტი შელია

შელია ტერენტი ლუკას ძე

1938 წლის 3 იანვრის სია, ხელმოწერა: ჟდანოვი, მოლოტოვი, კაგანოვიჩი, ვოროშილოვი

დაბადების თარიღი: 1900 წ.
ეროვნება:
ოჯახური მდგ.:
დაბადების ადგილი: ხობის რაიონი, სოფ. ხორგა, საქართველო
საცხოვრ. ადგილი:
განათლება:
სოც. წარმომავლობა:
პარტიულობა: სკკპ(ბ) წევრი 1924 წლიდან; გაირიცხა პარტიიდან მიმდინარე საქმესთან დაკავშირებით
სამუშაო ადგილი: დაპატიმრებამდე - ამიერკავკასიის სამხედრო ოლქის პოლიტიკური სამმართველოს ინსტრუქტორი; წოდება - ბატალიონის კომისარი.
ნასამართლობა:
განყოფილება: შინსახკომის მე-5 განყოფილება
გაასამართლა: შინსახკომის სამეული
მომხსენებელი: ლიფშიცი
მონაწილეობდნენ: ქობულოვი, ტალახაძე, წერეთელი, მოროზოვი
ბრალად ედება: რომ 1) იყო წევრი კ/რ სამხედრო ტროცკისტულ დივერსიულ-მავნებლური ორაგანიზაციისა, რომელმაც 01/12/1934 წელს განახორციელა ამხ. ს. მ. კიროვის ვერაგული მკვლელობა და შემდგომში ამზადებდა ტერორისტულ აქტებს საკავშირო კპ(ბ)-სა და საბჭოთა ხელისუფლების ხელმძღვანელთა წინააღმდეგ.
2) 1929 წლიდან დაპატიმრების დღემდე იყო აქტიური წევრი კ/რ ტროცკისტული სამხედრო ორგანიზაციისა, რომელიც ამზადებდა შეიარაღებულ გადატრიალებას საბჭოთა ხელისუფლების წინააღმდეგ.
3) ეწეოდა სამხედრო მოსამსახურეების კ/რ-ად დამუშავებას და კ/რ ორგანიზაციაში გადაიბირა ახალი წევრები.
მუხლი: 58-1-ბ, 58-8
სასჯელის ზომა: დახვრეტა, პირადი ქონების კონფისკაცია
დაპატიმრების თარიღი:
სხდომის თარიღი: 01/17/1938
დახვრეტის თარიღი: 01/20/1938
რეაბილიტაცია:
შენიშვნა:

Source: სტალინური სიები საქართველოდან [ელექტრონული მონაცემთა ბაზა] / ჰაინრიჰ ბიოლის ფონდი სამხრეთ კავკასიაში – HEINRICH BÖLL STIFTUNG SOUTH CAUCASUS, ინფორმაციის თავისუფლების განვითარების ინსტიტუტი – INSTITUTE FOR DEVELOPMENT OF FREEDOM OF INFORMATION (IDFI), საქართველოს შინაგან საქმეთა სამინისტრო, საერთაშორისო საზოგადოება „მემორიალი“, საქართველოში შვეიცარიის საელჩო – Embassy of Switzerland in Georgia. - 2013.
http://www.nplg.gov.ge/gwdict/index.php?a=term&d=26&t=655